कोशी अस्पतालमा क्यान्सरको उपचार गर्न भक्तपुर अस्पतालसँग सम्झौता

इकनिका सम्वाददाता
१३ भदौ, २०८१

विराटनगर– विराटनगरको कोशी अस्पतालमा क्यान्सर रोगको उपचार सेवा विस्तार गरिने भएको छ। सेवा विस्तारका लागि भक्तपुरको क्यान्सर अस्पतालसँग सम्झौता भएको छ।

भक्तपुर क्यान्सर अस्पातलका निर्देशक उज्जवल चालिसे र कोशी अस्पतालका निमित्त मेडिकल सुपरिटेन्डेन्ट डाक्टर रविनराज सिंहले सम्झौता पत्रमा हस्ताक्षर गरेका छन्। त्यसक्रममा स्वास्थ्य तथा जनसंख्यामन्त्री प्रदीप पौडेल र स्वास्थ्य मन्त्रालयका सचिव डाक्टर रोशन पोखरेल पनि उपस्थित थिए।

भक्तपुर क्यान्सर अस्पतालले सेवा उपलब्ध गराउने जनशक्तिलाई यातायात, खाजालगायत खर्चको लागि बजेटको व्यवस्था गर्नेछ भने जनशक्तिको व्यवस्था आफ्नो संस्थाको नियमित सेवा प्रभावित नहुने गरी मिलाईने छ।

महिनाको कम्तिमा एकपटक सेवा सञ्चालन हुने जनाईएको छ। कोशीमा हाल दैनिक ओपीडी सेवा, इन्डोर सेवा, डे–केयर केमोथेरापीसहितको ५ बेड सञ्चालनमा छ। अस्पतालमा ब्रेस्टको सर्जरी, पेट तथा आन्द्राको सर्जरी, मृगौला तथा प्रोस्टेटको सर्जरी, छालाको क्यान्सर सर्जरी सञ्चालनमा छन्।

१० वर्षदेखि क्यान्सर रोगको सेवा सुरु भएपनि विशेषज्ञ सेवाको अभाव छ।