सर्लाहीको सागरनाथ वन क्षेत्रमा चौकीदारको टाउकोबिना शव भेटियो

तलिम प्राप्त कुकुर झिकाएर अनुसन्धान सुरु ः प्रहरी

इकनिका सवाददाता
१९ पौष, २०८२

जनकपुर – सर्लाहीको ईश्वरपुर नगरपालिका–२ राईटरखोरमा सागरनाथ वन विकास परियोजनामा कार्यरत चौकीदारको टाउको अलग भएको अवस्थामा शव फेला परेको छ ।
ज्यालादारीमा कार्यरत राईटरखोरकै ४७ वर्षीय रामईश्वर महतोको टाउको अलग भएको अवस्थामा शव फेला परेको सर्लाही प्रहरीका प्रवक्ता प्रहरी नायव उपरिक्षक सरोज राईले वताए ।
महतोको शव घरदेखि करिब ५ सय मिटर टाढा सागरनाथ वन विकास परियोजनाको जंगलभित्र टाउकोबिनाको अवस्थामा भेटिएको हो ।
शनिबार ५ बजेतिर जंगलभित्र रुख काटिएको आवाज सुनेपछि चौकिदार महतो त्यसतर्फ गएका स्थानीयले वताए । तर उनी दिउँसोसम्म पनि घर नफर्किएपछि परिवारका सदस्य र स्थानीयले खोजी सुरु गरेका थिए ।

खोजतलासका क्रममा जंगलभित्र टाउको अलग भएको अवस्थामा अवस्थामा महतोको शव फेला परेको प्रहरी नायव उपरिक्षक राईले बताए ।
टाउको अझै भेटिएको छैन । टाउकोको खोजी कार्य भइरहेको प्रहरीले जनाएको छ । घटनास्थलमा धनुषाको लालगढबाट तालिम प्राप्त कुकुर झिकाएर प्रहरीले अनुसन्धान गरिरहेको छ ।